Published on 25.03.2026
പ്രാദേശിക ആസൂത്രണത്തിനും, കാലാവസ്ഥാ പൊരുത്തപ്പെടലിനും അനുയോജ്യമായ പരിപാടികൾ വികസിപ്പിക്കുന്നതിനുള്ള ശേഷി വർദ്ധിപ്പിക്കുക വഴി കാലാവസ്ഥാ മാറ്റത്തെ നേരിടുന്നതിന് സമൂഹത്തെ സജ്ജമാക്കുന്നതിൽ തദ്ദേശ സ്വയം ഭരണ സ്ഥാപനങ്ങൾക്ക് വലിയ പങ്ക് വഹിക്കാൻ കഴിയുമെന്ന് സെന്റർ ഫോർ സോഷ്യോ-ഇക്കണോമിക് ആൻഡ് എൻവയൺമെന്റൽ സ്റ്റഡീസ് (സി.എസ്.ഇ.എസ്.) പ്രസിദ്ധീകരിച്ച “വികേന്ദ്രീകൃത ഭരണവും കാലാവസ്ഥ പ്രതിരോധവും” എന്ന വർക്കിംഗ് പേപ്പർ ചൂണ്ടിക്കാണിക്കുന്നു. മുൻ ചീഫ് സെക്രട്ടറി ശ്രീമതി ശാരദ മുരളീധരൻ തയ്യാറാക്കിയ വർക്കിംഗ് പേപ്പർ ദുരന്ത ലഘൂകരണ മേഖലയിൽ കേരളത്തിലെ തദ്ദേശ സ്വയംഭരണ സ്ഥാപനങ്ങൾ നടത്തിയ ഇടപെടൽ ശ്രമങ്ങളുടെ രേഖപ്പെടുത്തലും, ഇക്കാര്യത്തിൽ തദ്ദേശ സ്വയംഭരണ സ്ഥാപനങ്ങളുടെ പ്രകടനം മെച്ചപ്പെടുത്തുന്നതിനുള്ള നിർദ്ദേശങ്ങളുമാണ് വിശദീകരിക്കുന്നത്.
കാലാവസ്ഥാ വ്യതിയാനത്തെക്കുറിച്ചുള്ള ചർച്ചകൾ ദേശീയ-അന്തർദേശീയ തലങ്ങളിൽ മാത്രം ഒതുക്കേണ്ടതല്ല. തീവ്രകാലാവസ്ഥാ സംഭവവികാസങ്ങൾ ജനങ്ങളുടെ ജീവിതത്തിലും ഉപജീവനമാർഗ്ഗത്തിലും ഉണ്ടാക്കുന്ന ആഘാതത്തെ കുറയ്ക്കുന്നതിനും, കാലാവസ്ഥാ വ്യതിയാനത്തെ ഉൾക്കൊണ്ട് ജീവിക്കാൻ സമൂഹത്തെ സജ്ജമാക്കുന്നതിനും, തദ്ദേശ സ്വയംഭരണ സ്ഥാപനങ്ങൾക്ക് നിർണ്ണായക പങ്ക് വഹിക്കാനുണ്ടെന്ന് പഠനം പറയുന്നു.
രാജ്യത്ത് ഉണ്ടാകുന്ന ദുരന്തങ്ങളോട് വിവിധ ദേശീയ, സംസ്ഥാന, പ്രാദേശിക തലങ്ങളിൽ ശരിയായ രീതിയിൽ എങ്ങനെ പ്രതികരിക്കണമെന്ന കാഴ്ചപ്പാട് ആദ്യമായി മുന്നോട്ട് വെച്ചത് 2005-ലെ ദേശീയ ദുരന്ത നിവാരണ നിയമമാണ്. ഈ നിയമം തദ്ദേശ സ്വയംഭരണ സ്ഥാപനങ്ങളുടെ പങ്കിനെ അംഗീകരിക്കുന്നു. കേരളത്തിൽ, 2018 ലെ പ്രളയകാലത്തെ ദുരന്ത നിവാരണ പ്രവർത്തനത്തിൽ തദ്ദേശ സ്വയംഭരണ സ്ഥാപനങ്ങളുടെ പങ്ക് മികച്ചതായിരുന്നു. ദുരന്ത സമയത്ത് ആദ്യം ഇടപെടുന്നവർ എന്ന നിലയിൽ തദ്ദേശ സ്വയംഭരണ സ്ഥാപനങ്ങൾ പ്രകടിപ്പിച്ച അവിശ്വസനീയമായ പ്രാദേശിക ധാരണയും രക്ഷാപ്രവർത്തനത്തിനായി വിഭവങ്ങൾ വിനിയോഗിക്കാനുള്ള ശേഷിയും ദുരന്തത്തിന്റെ ആഘാതം കുറയുന്നതിനു കാരണമായി. പ്രളയാനന്തരം, തദ്ദേശ സ്വയംഭരണ തലത്തിൽ കാലാവസ്ഥാ വ്യതിയാനം, പരിസ്ഥിതി സംരക്ഷണം, ദുരന്തനിവാരണം, ജൈവവൈവിധ്യം എന്നിവ അടിസ്ഥാനപ്പെടുത്തി വർക്കിംഗ് ഗ്രൂപ്പ് രൂപീകരിക്കപ്പെട്ടു.
സി.എസ്.ഇ.എസ്. വർക്കിംഗ് പേപ്പറിലെ പ്രധാന ശുപാർശകൾ ചുവടെ ചേർക്കുന്നു:
- കാലാവസ്ഥാ പ്രതിരോധം സംബന്ധിച്ച് ഉചിതമായ തീരുമാനമെടുക്കുന്നതിന് തദ്ദേശ സ്വയംഭരണ സ്ഥാപനങ്ങളെ സഹായിക്കേണ്ട ഉത്തരവാദിത്തം സംസ്ഥാനത്തിനുണ്ട്. ഉദാഹരണത്തിന്, നയ ചട്ടക്കൂട് രൂപപ്പെടുത്തുകയും മെച്ചപ്പെടുത്തുകയും ചെയ്യുക, ഹരിത നിർമ്മാണങ്ങളെ പ്രോത്സാഹിപ്പിക്കുക, ഉത്തരവാദിത്വ പശ്ചാത്തല വികസനം ഉറപ്പാക്കുക, സമഗ്ര മാലിന്യ സംസ്കരണ പരിഹാരങ്ങൾ നടപ്പിലാക്കുക, സബ്സിഡി സംവിധാനങ്ങൾ കാലാവസ്ഥയെ പ്രതിരോധിക്കുന്ന സാമൂഹിക-സാമ്പത്തിക പെരുമാറ്റത്തിന്റെ അടിസ്ഥാനത്തിലാക്കുക, പുതിയ ഫണ്ടിംഗ് സംവിധാനങ്ങൾ കണ്ടെത്തുക, ഉചിതമായ തീരുമാനങ്ങൾ എടുക്കുന്നതിന് നൂതന സാങ്കേതികവിദ്യകളും പുത്തൻ വിവരങ്ങളും പ്രയോജനപ്പെടുത്തുക എന്നിവ സംസ്ഥാനത്തിന്റെ ഉത്തരവാദിത്വം ആകേണ്ടതുണ്ട്.
- സ്പേസ് ടെക്നോളജിയും ഡേറ്റ ലഭ്യതയും മുമ്പൊരിക്കലും ഇല്ലാത്ത വിധം ഡേറ്റ സ്വാംശീകരിക്കാനും ഡീകോഡ് ചെയ്യാനുമുള്ള കഴിവ് സൃഷ്ടിച്ചിട്ടുണ്ട്. അത്തരം വിവരങ്ങൾ തദ്ദേശ സ്വയംഭരണ സ്ഥാപനങ്ങൾക്ക് ലഭ്യമാക്കുക വഴി വിപ്ലവകരമായ മാറ്റത്തിനു സഹായിക്കും. ഈ വിവരങ്ങളെ ഫലപ്രദമായി ഉപയോഗിക്കാൻ തദ്ദേശ സ്വയംഭരണ സ്ഥാപനങ്ങളെ സഹായിക്കുന്ന ഒരു സംവിധാനം സംസ്ഥാനം രൂപപ്പെടുത്തേണ്ടതുണ്ട്. ഇതിനായി, സംസ്ഥാനത്തെ എല്ലാ തദ്ദേശ സ്വയംഭരണ സ്ഥാപനങ്ങൾക്കും ഡേറ്റ ഉപയോഗിക്കാനും, അവ വ്യാഖ്യാനിക്കാനും, വിശകലനം ചെയ്യാനും സഹായിക്കുന്ന തരത്തിൽ, AI സാങ്കേതിക വിദ്യ ഉപയോഗപ്പെടുത്തിക്കൊണ്ടുള്ള, ഒരു പ്രത്യേക സാങ്കേതിക വിഭാഗം കിലയിൽ സ്ഥാപിക്കാവുന്നതാണ്. കാലാവസ്ഥാ സാഹചര്യങ്ങൾ കൃത്യമായി മനസ്സിലാക്കി ഇടപെടുന്നത് ഉറപ്പാക്കുന്നതിനായി സമൂഹവുമായി നിരന്തരം ഇടപഴകുന്നതിനുള്ള ഒരു തന്ത്രം ഇവർക്കുണ്ടായിരിക്കണം, അത് കിലയ്ക്ക് ഉറപ്പാക്കാനാവും.
- കാലാവസ്ഥാ അജണ്ട തദ്ദേശ സ്വയംഭരണ സ്ഥാപനങ്ങളുടെ പ്രവർത്തനങ്ങളിൽ സംയോജിപ്പിക്കേണ്ടതുണ്ട്. ഇത് ദീർഘകാലാടിസ്ഥാനത്തിൽ സുസ്ഥിരമായി നിലനിൽക്കണമെങ്കിൽ ഫലാധിഷ്ഠിത (outcome based) ആസൂത്രണവും നടപ്പാക്കലും തദ്ദേശ സ്വയംഭരണ ഭരണ സംവിധാനത്തിന്റെ അവിഭാജ്യ ഘടകമായി മാറണം. കാലാവസ്ഥാ പൊരുത്തപ്പെടുത്തൽ ആവശ്യങ്ങളും, വെല്ലുവിളികളും ഏറ്റെടുക്കാൻ കഴിയുന്ന പ്രൊഫഷണലുകൾ ഇവിടെ ഉണ്ടായിരിക്കണം. തദ്ദേശ സ്വയംഭരണ സ്ഥാപനങ്ങളുടെ ആസൂത്രണ വിഭാഗത്തിന്റെ മെച്ചപ്പെടുത്തലിലൂടെ മാത്രമേ ഇത് സാധ്യമാകൂ.
- കാലാവസ്ഥാ പ്രതിരോധവുമായി ബന്ധപ്പെട്ട് പ്രത്യേക പ്രവർത്തന പദ്ധതി രൂപീകരണവും അതിന്റെ നടത്തിപ്പും തദ്ദേശ സ്വയംഭരണ സ്ഥാപനങ്ങൾ നടത്തേണ്ടത് അനിവാര്യമാണ്. പ്രാദേശിക തലത്തിലെ കാലാവസ്ഥാ പ്രതിരോധ ശ്രമങ്ങൾ പ്രോത്സാഹിപ്പിക്കുന്നതിനായി, തദ്ദേശ സ്വയംഭരണ സ്ഥാപനങ്ങൾക്കായി ഒരു ഗ്രാന്റ് പുതുതായി തുടങ്ങാവുന്നതാണ്.
വർക്കിംഗ് പേപ്പർ https://csesindia.org/wp-content/uploads/2026/03/Working-Paper_33.pdf എന്ന ലിങ്കിൽ ലഭ്യമാണ്.
കൂടുതൽ വിവരങ്ങൾക്ക് ബന്ധപ്പെടുക: ഡോ. രാഖി തിമോത്തി (9873101227), ഫെലോ, സി.എസ്.ഇ.എസ്.